नमस्कार, यो महाराजगंज चाट क्याम्पस हो । यहाँ दक्ष तथा अनुभवि चाट विशेषज्ञहरु द्धारा पाइलैपिच्छे तपाइले अनिच्क्षाय बमोजिमका चाट पस्कने काम हुन्छ ।
चाटको इतिहास खोतल्दै जाने हो भने संसारमा सर्वप्रथम चाट खाने पात्रहरु पाण्डव हुन त्यो पनि द्रौपदीको हातबाट (हैट, सिरियस कुरो हो नहासौँ न) । भनिन्छ एकदिन महारानी कुन्तिले आफ्नी बुहारी द्रौपदीको व्यवस्थापन गर्न सक्ने क्षमताको परीक्षा लिने विचार गरिन । उनले केहि टुक्रा आलुहरु र गहुँको पिठो दिदै आफ्ना सबै पतिहरुलाइ मनपर्ने खाना खुवाउन भनिन । फलत ः द्रौ पदीले सबै परिकारहरुलाइ मिसमास पारिन र चाटको आविष्कार गरिन ।
चाट शब्द ‘चाट्नु’ बाट अपभ्रंशहुदै बनेको हो । अर्थात यो परिकार यति स्वादिष्ट हुन्छ कि तपाइ आफ्ना औँला या ओठ नचाटि बस्नै सक्नुहुन्न । फेरि यसमा मसला र खुर्सानीको अधिकतम प्रयोग गरिएको हुन्छ , जसले गर्दा सामान्य खाना भन्दा यो तिख्खरो हुन्छ । अझ महत्वपूर्ण कुरा त के छ भने जस्तै भोकाएको मान्छे पनि एक प्लेट चाट खाएपछि त अघाउँछ, अघाउँछ । चाट खानुको अर्को फाइदा भनेको एउटै पैसामा तपाइले धेरै परिकारको स्वाद चाख्न पाउनुहुनेछ । यत्ति भनिसकेपछि अब सबैले बुझिसक्नु भयो होला चाट सामान्य मानिसले, सामान्य तरिकाले , सामान्य परिस्थितिमा खाने सामान्य परिकार हुँदै होइन । चाट एक विशिष्ट खाना हो ।
तर बिडम्बना यति विशिष्ट खाना हुँदाहुँदै पनि आइओएम भित्र भने सितिमिति कुनैपनि क्यान्टिनमा चाट बन्दैन । क्याम्पस बाहिर पनि यत्तिका वर्ष भयो कसैले आँट गरेर चाट हाउस खोल्न सकेका छैनन् । कारण सजिलो र स्पष्ट छ । क्लासमा , पोस्टिङमा ,ड्युटिमा , लाइब्रेरीमा, पे्रजेनटेसनमा अनि होस्टेलका रुमरुममा समेत सालभर ‘ट्वान्टि फो सेभेन’ चाट मात्रै खाने विचरा बबुरो÷बबुरी कुन स्वादका लागि फेरि चाट किनिकिनी खाओस ।
तसर्थ यस आलेखको एकमात्र उदेश्य भनेको आइओएम भित्र बन्ने विभिन्न किसिमका चाटहरुको चर्चा गर्नु नै हो । यदि तपाइहरुले पनि तलका मध्य कुनै चाट खाने सुअवसर प्राप्त गर्नु भएको छ भने ममः भनेर घुटुक्क थुक निल्नु होला ।
स्विट चाट
यो चाट परिवारमा म्युटेसन भएर जन्मिएको चाट हो । त्यसैले त यो अरु चाटहरु भन्दा निकै नै भिन्न छ । चाट भएर पनि एकदम गुलियो छ , मिठो छ । तर बिडम्बना, सात वर्षे आइओएम बसाइका दौरान यस्तो चाट सुरुका केहि महिना मात्र खान पाइन्छ । तर यदि तपाइ लेडिज हुनुहुन्छ भने चाहिँ स्विट चाटको एक्सटेन्डेड भर्सन खान पाउनुहुनेछ अर्थात अर्को व्याच नआउन्जेलसम्म , सालभर (बट कन्डिसन्स अप्लाइ) ।
स्विट चाट विशेषत सिनियरहरुले खुवाउँछन् । यो चाट कलेज भएका कारण अन्त मेडिकल कलेजमा जस्तो यहाँ ¥यागिङ हुँदैन । बरु ¥यागिङको सट्टामा नयाँ आउने विद्यार्थीहरुको भव्य स्वागत हुन्छ त्यो पनि विथ स्विट चाट । यस्तो चाट एल्लो बिल्डिङ रुम नम्बर नाइन , बेसिक साइन्स लेक्चर हल , हाम्रो मेस , कफि सप , मोमो म्याजिक , टिट्स–बिट्स, हेपाटाइटिस भ्याक्सिन , फस्ट एड ट्रेनिङ आदिमा महिना, दुइ महिनासम्म चलिरहन्छ ।
स्विट चाट नाम जत्तिको स्विट भने अलि हुदैन । समोसाका पत्र भित्र स्वार्थ लुकेका हुन सक्छन् । दहिको सेतो लेपनले खुवाउनेको कालो मनलाइ छोपेको हुन सक्छ । तर यसको चिन्ता पटक्कै लिनुपर्दैन । मज्जाले खानोस अनि पचाइदिनुस । आखिर स्विट चाटमा नुन हुदैन । त्यसैले ख्वाउनेको नुनको सोजो गर्नुपर्छ भन्ने पनि छैन ।
उहि बाजेको पुरानो चाट
यो सदिऔँ देखि चलिआएको चाट हो । परम्परागत शैलिमा बन्ने भएका कारण , कुन अवस्थामा खान पाइने र चाटमा के–के हुन्छ भन्ने कुरा पहिल्यै अनुमान लगाउन सकिन्छ । जस्तो कि दाह्री–कपाल पालेर पेडियाट्रिक्स पोस्टिङ जाँदा , चप्पल लगाएर फरेन्सिक अटोप्सीमा जाँदा, यादवको किताब बोकेर एनेस्थेसिया पोस्टिङ जाँदा, डटपेन नलिइ सिएम भाइभा दिन जाँदा ( कहिलेकाहिँ यो चाटले भने डरलाग्दो फुड पोइजनिङ पनि गराउन सक्छ), नेम ट्याग नझुन्ड्याइ सर्जरी राउन्डमा जाँदा आदि अवस्थामा उहि बाजेको पुरानो चाट सियोर सट खान पाइन्छ ।
यो चाटको प्रमुख विशेषता भनेको चाहिँ यो आफूले खान भन्दा पनि अरुले खाएको हेर्न बहुत स्वादिलो हुन्छ । स्वादमा खासै तिख्खरोपन नहुने यस किसिमको चाट खान कुनै स्पेसल अकेजन भने पर्खिरहनु पर्दैन । हरेकदिन कसै न कसैले खाइरहेकै हुन्छ ।
मगमगे चाट
यो एकप्रकारको खुस्बुदार चाट हो । परैबाट मगमग बास्ना आउने भएका कारण यसलाइ मगमगे चाट भनिएको हो । यसको बास्ना यति जोडदार हुन्छ कि तपाइले दुइ कोश परबाटै थाहा पाउनु हुन्छ , अब चाट खान पाइने भयो । मगमगेहरुले कस्तुरीका झैँ चाट बनाउने रिसिपि आफ्नो नाबीमै बोकेर हिँडेका हुन्छन् , कतै भेट्यो कि त ख्वाइहाल्छन् । आइओएमले सायद इन्ट्रास लिदै हरेक ब्याचमा यस्ता मगमगे चाट बनाउन पोख्तहरुलाइ एक वा दुइवटा कोटा अनिवार्य छुट्याइदिएको हुन्छ ।
उदाहरणका लागि, यदि तपाइ होस्टलबाट लाइब्रेरी जाँदै हुनुहुन्छ र मगमगे चाट मनमोहन साइडबाट यतै आइरहेको गन्ध पाउनु भयो भने पुरै इमर्जेन्सी घुमेर ब्याक साइडबाट लाइब्रेरी जानु बुद्धिमता ठहर्छ । त्यस्तै कहिले काहिँ भने मगमगे चाट क्युबिकल–क्युबिकल चहार्दै तपाइनेर आइपुग्न पनि सक्छ । त्यस्तो विषम परिस्थितिमा चाहिँ घोप्टो परेर निदाएको जस्तो गर्नु सबैभन्दा उत्तम विकल्प हो ।
भाग्दा भाग्दै पनि कहिलेकाहिँ यस्तो चाटको फेला पर्नु भयो भने यसपछिको लाइन सधै सम्झनुहोला । मगमगे चाटको सबैभन्दा गतिलो एन्टिडोट भनेको उल्टो उसैलाइ चाट खुवाउन नै हो । यदि तपाइसँग यो खुबिलिटि छ भने ठिक , नत्र अँ , अँ गरेर चाट खाइरहनुको विकल्प देखिन्न ।
जयनेपाल÷लालसलाम चाट
यस्ता चाट भने प्राय चुनाव ताका प्रशस्तै खान पाइन्छ । बेसिक साइन्सको लेक्चर हलबाट सुरु हुने यस्तो चाट खुवाउने कार्यक्रम , हाम्रो मेश , होस्टलका रुमरुम हुदै कहिले काहिँ आलिसान पार्टी प्यालेसहरुमा समेत पुग्दछन् । प्रत्यक्ष रुपमा चुनावमा उठेको उमेदवार र अप्रत्यक्ष रुपमा स्वचालित कटप्पाहरुको हातबाट एक डेढ हप्तासम्म मनग्गे चाट खाइरहन पाइन्छ । बिडम्बना चाहिँ के भन्दा साम्यवादी होस कि पुजिवादी दुवैले खुवाउने चाटको स्तर भने उहि नै हुन्छ ।
यो चाट खाने आफ्नै विशिष्ट शैलि छ । चाट खुवाउने व्यतिmले सुरुमा अनिवार्य चाट खाने व्यतिmसँग हात मिलाउँछ । त्यसरी च्याप्प हात समातिसकेपछि , उसैले तपाइको मुखमा कपाकप चाट हालिदिन्छ । त्यो पनि पहिला मटर त्यसपछि आलु गरेर बिस्तारै–बिस्तारै होइन सिधै सिङ्गो समोसाको डल्लो ।
सायद आइओएम भरिकै सबैभन्दा दुर्गन्धित चाट यहि हो । यो चाटको साइडइफेक्ट वर्षौसम्म पनि देखिरहन्छ , यसले गराउने ‘हर्टबर्न’का रुपमा । त्यस्तो हर्टबर्न जुन सायद कुनै पिपिआइले पनि ठिक नगर्न सक्छ ।
टक्जिक चाट
यो चाटहरुको पनि चाट हो अर्थात महाचाट । स्वादमा सबैभन्दा तिख्खरो र कहिले काहिँ प्राणघातक पनि सिद्ध हुनसक्ने भएकाले यसलाइ टक्जिक चाट भनिएको हो । यस्तो चाट प्राय बोर्ड इक्जामको भाइभाको दौरान खान पाइन्छ । ‘वाट इज फिजियोलोजी’ देखि ‘बेसिक साइन्स नै कमजोर भयो’ भन्ने बेलासम्म हरेक वर्ष हरेकले हरेक मंसिरदेखि पौषसम्म खाने चाट हो यो ।
लाउ चाऽऽऽऽट भनेर होला सायद सबैले दाह्री कपाल काटेर चिल्लो बन्छन् । टक्जिक चाटको थर्मल इफेक्टका कारण महिनौँ खुम्चिएका एप्रोनमा आइरन लाग्छन् । जुत्ता, चाटेकै जस्तो गरि टल्किन्छन् । अनि रातभर रातभर नसुतेका काला–राता आँखा मिच्दै अनि सरि सर र आइ डन्ट नो म्याम भन्दै मुफ्तमा चाट खाइरहन्छम ।
यी त भए केहि प्रतिनिधि चाटहरु । यो बाहेक अनेकौ अरु चाटहरु पनि हुन्छन जसको व्याख्या यहा गरिएको छैन।
यहाँ बताइएका कुनै पनि चाट तपाइले यदि खानु भएको छैन भने सोच्नुस कि तपाइ आइओमाइट्स नै होइन । यी र यस्ता चाटहरु ३८ वर्ष अघिकाले पनि खाए र ३८ औँ ले पनि खाँदै छन् । सायद कति त खाएर, ख्वाउने पनि भइसकेका छन् ।
हेल्लो सरकार , आइओएमबाट पास आउट हरएक ग्राजुएटलाइ डाक्टरी डिग्रिको साथमा एउटा चाट विशेषज्ञको पैरवी पनि सङसँगै दे ।
