सधैँ-सधैं

लत सधैँ-सधैं चुरोटको मात्र हुँदैन
लत कहिलेकाहिँ नोटको पनि हुन्छ
लत कहिलेकाहिँ भोटको पनि हुन्छ
लत सधै- सधैँ चुरोटको मात्र हुँदैन
लत कहिलेकाहिँ चोटको पनि हुन्छ ।।

नसा सधैँ-सधैँ दारुको मात्र हुँदैन
नसा कहिलेकाहिँ पारुको हुन्छ
कहिले चारुको हुन्छ
नसा धेरैजसो आफ्नीको होइन अरुको हुन्छ ।।

सम्झना सधैँ-सधैँ झरीको हुँदैन
सम्झना कहिलेकाहिँ चरीको हुन्छ
सम्झना कहिलेकाहिँ परीको हुन्छ
सम्झना जीवनभर
तिमीले अन्तिमपटक भनेको सरीको हुन्छ ।।

रोजाइँ सधैँ-सधैँ राम्रो हुँदैन
रोजाइँ कहिलेकाहिँ चाम्रो हुन्छ
रोजाइँ कहिलेकाहिँ हाम्रो हुन्छ
दिन्छन् इशले एकैथोक मात्र भनेपनी
रोजाइँ सधैभरी तिम्रो हुन्छ ।।

इच्छा सधैँ-सधैँ जितको हुँदैन
इच्छा कहिलेकाहिँ अरुको हितको हुन्छ
इच्छा कहिलेकाहिँ असल मितको हुन्छ
इच्छा जीवनभर एउटा सुमधुर प्रीतको हुन्छ ।।

अम्मल सधैँ-सधैँ गाँजाको हुँदैन
अम्मल कहिलेकाहिँ सत्ता , शक्ति राजाको हुन्छ
अम्मल कहिलेकाहिँ सित्तैमा पाइने खाजाको हुन्छ
एउटा उमेर हुन्छ जतिखेर
अम्मल जग्गे , जन्ती र पन्चे बाजाको हुन्छ ।।

खत सधैँ-सधैँ घाउको हुँदैन
खत कहिलेकाहिँ ॠण दिने साउको हुन्छ
घरबाट बिरामी बूढो बाउको हुन्छ
खत यो मनमा सधैँभरी
हुन नसकेको त्यो नाउँको हुन्छ ।।